 Körpənizin sağlamlığı üçün...
İnfeksiyaların böyük bir hissəsi əllə yoluxduğu üçün körpənin qulluğu ilə məşğul olan analar əllərini tez-tez yumalıdırlar ki, körpələri müxtəlif xəstəliklərə məruz qalmasınlar. Körpələrin orqanizmi daha həssas olduğu üçün bu mənada gigiyenik qaydalara əməl etmək vacibdir. Çünki körpələr hətta zəif mikroblardan belə, xəstəliyə yoluxurlar.Körpəyə baxan ana onun alt bezini dəyişdirdikdən sonra mütləq əllərini möhkəm yumalıdır.
Həmçinin körpənin də əlləri təmiz yuyulmalı və təmiz dəsmalla silinməlidir.
Xəstəliktörədən viruslar daha çox qış aylarında çoxaldığı üçün körpənin geyiminə də ciddi diqqət yetirmək lazımdır. Bunun üçün ilk şərtlərdən biri də körpənin başına papaq qoymaqdır. Tərləyib soyuqlamasının qarşısını almaq üçün isə körpəyə aşırmalı paltar geydirmək məsləhət deyil.
Mütəxəssislərin fikrincə, düzgün qidalanmayan körpələr də daha tez xəstələnirlər. Bu mənada ana südü xəstəliklərin qarşısının alınmasında ciddi rol oynayır. 2 yaşına qədər ana südü ilə qidalanan körpələrin immunitet sistemləri də güclü olur. Üstəlik, belə uşaqlar başqa uşaqlarla müqayisədə daha az xəstələnirlər... |
